Future ID: Mi kaminda, mi futuro

Un dia kreativo pa hobennan entre 10-15 aña den kua nan ta mustra, pa medio di arte i ekspreshon, ken nan ta i ken nan ke bira. Dor di hasi un outoretrato, pa medio di pintura, skirbimentu i poesia, nan ta haña espasio pa visualisá nan vishon di futuro i nan soñonan. Nan bos, forsa i speransa pa futuro ta wordu reforsá i hasi visibel. Durante e fase di edat aki, kaminda hobennan ta pasa pa e proseso di desaroyo di identidat, e nesesidat di independensia, privasidat, un opinion propio i responsabilidat ta oumentá. Tambe nan ta bira mas envolví sosialmente i ta kuminsá pensa riba pregunta di bida, kiko ta bon i malu, i balornan i normanan.

Na final di e dia, nan por duna un presentashon kortiku i deskribí kiko nan a pinta i dikon.

Dikon e grupo aki?
Muchanan ku ta biba den internado a pasa pa situashonnan di kas no sigur, instabilidat of otro eksperensianan impaktante. Promé ku nan ta wordu mira komo individuo, nan ta wordu etiketá. Dor di nan estadía den internado, nan ta resaltá mas lihé den skolnan i sistemanan di yudansa, i nan ta biba bou di mas reglanan i supervishon. Esaki ta hasi ku komportamentu normal di mucha of puber ta wordu mira mas biaha komo komportamentu problemátiko, miéntras ku den realidat hopi biaha ta trata di reakshonnan di stres of supervivensia.

E muchanan aki ta wordu pone mas lihé den un lus negativo dor di e etiketa ku nan ta karga. Adultonan i institushonnan, sin nan mes realisá, ta wak nan ku un “bril di problema”, tin algun biaha ekspektativanan mas abou i ta papia mas tokante nan ku ku nan. Stereotipashon ta hasi ku fayonan keda pega mas largu i ku nan reputashon ta keda fiksa mas lihé.

Hustamente p’esei e grupo aki ta ideal pa proyektonan di arte kaminda nan ta hasi un outoretrato di nan futuro. Arte ta ofresé un manera sigur pa ekspresá nan mes sin hustisia, palabranan of kontrol. E ta pasa riba bèrguensa i ta duna espasio na sintimentu i pensamentunan ku otro manera lo keda skondí. Dor di laga nan pinta ken nan ke bira, nan ta haña regia, nan ta wordu mira komo pensadónan en bes di problema, i nan mundu interior ta wordu rekonosé komo balioso. Ademas, e aktividat ta ofresé espasio pa hasi talento i kualidatnan visibel ku, dor di e situashon i ambiente kaminda nan ta biba, generalmente ta keda den sombra.