Riba dia 15 i 16 di mart 2024 lo tuma lugá e akshon boluntario di mas grandi na Kòrsou i den reino!
Bou di e nòmber NLdoet, ARUBA DOET, BON DOET, CURA DOET, STATIA DOET, SABA DOET i SXM DOET, e seis inisiativanan akí tin komo meta pa enfoká importansia di trabou boluntario i pa stimulá tur suidadano pa pone man na obra un (parti di un) dia, na bienestar di henter komunidat!
CURA DOET ta un inisiativa di Curaçao Cares i Oranje Fonds.
Curaçao Cares ta un plataforma pa boluntario ku ta forma un brùg entre boluntario, kompania i organisashon sosial i ku tin komo meta stimulá embolbimentu sosial i aserkamentu entre suidadanonan. Curaçao Cares ta dediká na yuda amplia, reforsá i promové trabou boluntario na Kòrsou.
Oranje Fonds ta sostené inisiativanan sosial den Reino ku fondo, konosementu i kontakto. Hulanda ya tin hopi aña ta organisá NLdoet, kual ta e inspirashon pa akshonan di CARIB DOET riba e diferente islanan. Oranje Fonds ta e fondo nashonal mas grandi riba tereno sosial, i ta saka kara di Reino. Kada aña e ta gasta mas o menos € 30 mion na organisashon i proyekto ku ta reforsá unidat sosial na Hulanda i den e parti di Reino den Karibe. Rei Willem-Alexander i Lareina Máxima ta e pareha protektor di e fondo.
Serka hopi organisashon sosial, boluntarionan ta e kurason ku ta bati!
Curaçao Cares i Oranje Fonds ta mustra ku CURA DOET kon importante siudadano aktivo ta pa nos komunidat. Tambe CURA DOET ta krea un bon imahen pa trabou boluntario i ta mustra kon agradabel i den bon ambiente trabou boluntario por tuma lugá.