Dikon partisipá ku CURA DOET?
Ku partisipashon den CURA DOET bo isla i bo empresa òf skol ta haña un impulso positivo. Bo relashonnan lokal ta haña mas forsa i bo ta duna un bon ehèmpel. I di e otro banda tin organisashon sosial ku danki na bo koperashon por realisá meta ku riba nan mes forsa lo nan no por a logra, òf kisas ku mashá difikultat so.
Man na obra huntu ku koleganan
CURA DOET ta un okashon ideal pa bo mustra ku bo organisashon ta koperá pa logra un mihó ambiente di bida. Komo empresa por ehèmpel bo por skohe un proyekto pa kumpli kuné huntu ku bo empleadonan komo un bon alternativa pa e tradishonal ‘teambuilding’ òf dia di rekreo.
Pero bo por hasi mas ku esei! Yuda hasi un proyekto eksitoso ofresiendo bo produkto òf servisio gràtis òf na preis redusí. Manera fèrf òf otro material, òf ko’i kome pa mèrdia. Òf aktivá bo ret di kontakto, reklutá bo klientenan òf bo relashonnan den medionan di komunikashon.
Partisipá komo skol
Klaro ku skol tambe por partisipá den CURA DOET. Reuní un klas òf henter skol i yuda ku un tarea òf aktividat den boso bario. Pensa por ehèmpel riba un mèrdia di wega ku habitantenan di un kas di kuido, òf drecha un tereno deportivo. Pa bo alumnonan esaki lo ta un eksperiensha nobo, yudando un organisashon sosial, kisas nan promé partisipashon den trabou boluntario. Ademas di esei e ta un dia inspirativo i agradabel.